$1-B investments, pasalubong ni PNoy mula Japan

Ang pagkikita ni Pangulong Aquino at ni Emperor Akihito kanina ay maituturing na ring pagpapakita ng bansang Japan ng kumpiyansa sa ating bansa.

Masaya naman ang pangulo dahil ang naturang kumpiyansa ay sinabayan ng pangako ng malalaking kumpanyang Hapones na palalawakin pa nila ang negosyo nila sa Pilipinas.

Hindi pa nagbibigay ng detalye ang Department of Trade and Industry, pero nasapul umano nila ang target na $1.1 bilyon na investments.

Pahayag ni Aquino, “Mahirap naman sabihing maraming nakuha, siyempre, first, bago 'yung prime minister; second, nagre-recovery efforts pa lang sila 200 days from the March 11 incident.”

Bukod dito, nakuha ng Pangulong Aquino ang katiyakan ng pamahalaang Hapones na itutuloy nila ang Official Development Assistance (ODA) sa Pilipinas na nagkakahalaga ng $3 bilyon para sa taong 2011. Ito'y kahit 'di pa man sila nakakabangon sa lindol at tsunami na nangyari sa kanilang bansa noong Marso.

“There's a commitment na ime-maintain 'yung ODA assistance sa atin. So, inspite of their difficulties, handa pa rin silang tumulong sa atin, paano naman hindi ikagagalak ng kalooban mo 'yon, 'di ba?” sabi ni Aquino.

Para sa pangulo, sulit na ang P20 milyon na gastos ng mga Pilipino sa biyahe niya sa Japan.

Magaan ang loob ng pangulo na umalis sa Japan dahil may bitbit siyang pasalubong para sa mga kababayan natin.

Sa pagdating niya sa Pilipinas, ang problema namang iniwan ng nagdaang bagyo ang kanyang aasikasuhin.